ہائی کمیشن کی کوششیں، بھارت میں قید 3پاکستانی شہری رہا

نئی دہلی (ویب ڈیسک) بھارت میں قید تین پاکستانی شہری رہا ہو کر وطن واپس پہنچ گئے، واہگہ بارڈر کے راستے واپس آئے اصغر علی، رمضان اور محمد ادریس کو ہار پہنائے گئے اور خوش آمدید کہا گیا۔
ذرائع کے مطابق پاکستانی شہریوں کی بھارت کی جیلوں سے رہائی میں پاکستان ہائی کمیشن نئی دہلی نے اہم کردار ادا کیا۔ محمد ادریس عرف اقبال کو 1995ء میں منشیات سمگلنگ کے الزام میں گرفتار کیا گیا تھا اور انہیں 30سال بعد بھارتی جیل سے رہائی ملی۔
محمد رمضان کو 2010ء میں اسی نوعیت کے الزام میں گرفتار کیا گیا تھا اور انہیں 15سال بعد رہا کیا گیا۔ اصغر علی کو غیر قانونی طور پر بھارت داخلے کے الزام میں حراست میں لیا گیا تھا اور انہیں بھی رہا کیا گیا۔
پاکستانی ہائی کمیشن نے کہا ہے کہ بھارت میں موجود تمام پاکستانی قیدیوں کی رہائی اور وطن واپسی کے لیے اپنی کوششیں جاری رکھے گا۔