لاہور:(بیوروچیف)لاہور میں بارش کے بعد اعلیٰ شخصیات کے خلاف نامناسب زبان استعمال کرنے والا شہری گرفتار، معافی مانگ لی
دو روز قبل شہری نے نامناسب زبان کا استعمال کیا تھا جس کے بعد ویڈیو وائرل ہوگئی تھی۔
پنجاب کے دارالحکومت لاہور میں دو روز قبل بارش کے پانی میں پھنسنے کے بعد وزیراعلیٰ مریم نواز اور دیگر شخصیات کے خلاف نازیبا زبان استعمال کرنے والے بزرگ کو پولیس نے حراست میں لے لیا۔
پولیس نے شہری کو حراست میں لیا جس کے بعد اُس نے اپنا ویڈیو پیغام ریکارڈ کروایا جس میں اپنے کیے پر ندامت کا اظہار کرتے ہوئے حکومت سے معافی مانگی۔
انہوں نے اپنے ویڈیو پیغام میں کہا کہ میں حکومت سے معذرت چاہتا ہوں، وزیراعلیٰ پنجاب، پاک فوج، پاکستان زندہ باد‘۔
مسلم لیگ ن کی رہنما نے شہری کا تازہ ویڈیو پیغام سوشل میڈیا پر شیئر کیا۔
واضح رہے کہ دو روز موٹرسائیکل کے ہمراہ جانے والے شہری لاہور کی شاہراہ پر دو فٹ پانی میں پھنس گئے تھے جس کی وجہ سے اُن کی بائیک بند ہوئی تو انہوں نے ایک شہری کو ویڈیو بیان دیا جس میں اعلیٰ شخصیات سمیت دیگر کے خلاف نامناسب زبان کا استعمال کیا گیا تھا۔
سوشل میڈیا صارفین نے کہا ہےکہ وزیراعلیٰ مریم نواز کے خلاف نازیبا الفاظ استعمال کرنے والےشخص کا ”سافٹ ویئر “ اپ ڈیٹ ہو گیا، معافی مانگ لی۔
یہ بیان سوشل میڈیا پر وائرل ہوا تو حکومت مخالف حلقوں نے بزرگ شہری کی خوب پذیرائی بھی کی اور پنجاب حکومت کو آڑے ہاتھوں لیا تھا۔
