لاہور (سلمان حسین) مریم نواز شریف نے ’’وزیراعلیٰ پنجاب رحمت کارڈ‘‘ پروگرام کا ڈیجیٹل افتتاح کر دیا ہے، جس کے تحت صوبے میں پہلی مرتبہ 50 ہزار بیواؤں اور یتیم بچوں کو مالی امداد فراہم کی جائے گی۔
پروگرام کے مطابق پنجاب میں مستحق بیواؤں اور یتیم بچوں کو ایک لاکھ روپے فی کس دیے جائیں گے۔ یہ پروگرام صوبائی زکوٰۃ فنڈ سے چلایا جا رہا ہے جس کیلئے 5000 ملین روپے کی ریکارڈ رقم مختص کی گئی ہے۔
شفاف نظام اور ڈیجیٹل طریقہ کار
بریفنگ کے دوران بتایا گیا کہ رحمت کارڈ کیلئے درخواستیں موبائل ایپ اور ویب پورٹل (https://rahmatcard.punjab.gov.pk) کے ذریعے جمع کرائی جا سکتی ہیں۔ مزید معلومات کیلئے ہیلپ لائن 1077 بھی فراہم کی گئی ہے۔
مستحقین کا انتخاب پنجاب سماجی و اقتصادی رجسٹری (PSER) ڈیٹا بیس کے ذریعے کیا جائے گا جبکہ ضلعی کوٹہ سسٹم کے تحت حتمی انتخاب ہوگا۔ اگر کسی کا PSER میں اندراج نہ ہو تو نادرا سے ڈیٹا کی تصدیق کی جائے گی۔
ادائیگیاں جاز کیش والٹ اکاؤنٹ کے ذریعے کی جائیں گی اور اس کے سروس چارجز حکومت پنجاب برداشت کرے گی تاکہ مستحق افراد کو مکمل مالی ریلیف مل سکے۔
اہلیت کے معیار
رحمت کارڈ کے تحت صرف وہی افراد اہل ہوں گے جو شرعی طور پر زکوٰۃ کے مستحق ہوں گے۔ سرکاری ملازمین، پنشنرز اور صاحب نصاب افراد اس پروگرام کے اہل نہیں ہوں گے۔
حکومت نے پروگرام کو شفاف، منصفانہ اور میرٹ کی بنیاد پر چلانے کی ہدایت کی ہے تاکہ امداد صحیح مستحق افراد تک پہنچ سکے۔
وزیراعلیٰ کا مؤقف
مریم نواز شریف نے کہا کہ رحمت کارڈ پروگرام کا مقصد مستحق افراد کو سماجی تحفظ اور معاشی خودمختاری فراہم کرنا ہے۔ ان کا کہنا تھا کہ وہ چاہتی ہیں پنجاب میں کوئی بیوہ یا یتیم بچہ خود کو بے سہارا محسوس نہ کرے۔
انہوں نے کہا کہ حکومت روایتی سیاست کے بجائے عوامی خدمت پر یقین رکھتی ہے اور یہ پروگرام اسی وژن کا حصہ ہے۔
مزدوروں کیلئے خصوصی پیغام
اس موقع پر وزیراعلیٰ نے عالمی یوم مزدور کے حوالے سے اپنے پیغام میں محنت کشوں، مزدوروں اور کان کنوں کو خراج تحسین پیش کیا۔ انہوں نے کہا کہ حکومت مزدوروں کے معیار زندگی کو بہتر بنانے کیلئے پرعزم ہے۔
انہوں نے بتایا کہ 14 لاکھ سے زائد محنت کشوں کیلئے راشن کارڈ کے ذریعے 3000 روپے ماہانہ سبسڈی دی جا رہی ہے جبکہ محفوظ ماحول، صحت اور تعلیم کی سہولیات پر بھی کام جاری ہے۔
سیکیورٹی صورتحال پر اظہار تشکر
مزید برآں وزیراعلیٰ نے پاک افغان سرحد پر فتنہ الخوارج کی دراندازی کی کوششیں ناکام بنانے پر سیکیورٹی اداروں کو خراج تحسین پیش کیا۔
