اسلام آباد (ویب ڈیسک) پاکستان تحریک انصاف کے چیئرمین بیرسٹر گوہر نے کہا ہے کہ وقت نے ثابت کردیا کہ سیاسی ہتھکنڈوں کے ذریعے کسی کو مائنس نہیں کیا جاسکتا، ہم بھی کسی کو سیاسی طور پر مائنس کرنے کے حق میں نہیں ہیں۔ عدالتی احکامات پر عملدرآمد سے ملک کا سیاسی درجہ حرارت کم ہوگا، حکومت کو شارٹ کٹ اختیار کرنے کے بجائے مذاکرات کی طرف بڑھنا چاہیے۔
پارلیمنٹ ہاؤس میں میڈیا سے گفتگو کرتے ہوئے بیرسٹر گوہر نے کہا کہ سیاست اپنی جگہ لیکن ملک اور جمہوریت سب سے زیادہ اہم ہیں۔ عدالت کے حکم پر عملدرآمد ہوگا تو آگے بات بنے گی۔
انہوں نے کہا کہ عمران خان کی صحت پر کبھی سیاست نہیں کریں گے۔ صحت سے متعلق رپورٹس کو ذاتی یا سیاسی معاملات کے لیے استعمال نہیں کیا جائے گا، کیونکہ عمران خان کی صحت کا مسئلہ سب سے اہم ہے۔
بشریٰ بی بی کو بھی طبی سہولیات فراہم کی جائیں: بیرسٹر گوہر
چیئرمین پی ٹی آئی نے کہا کہ بشریٰ بی بی کی صحت سے متعلق مسائل بھی حل کیے جانے چاہئیں اور انہیں ہسپتال منتقل کرکے ضروری طبی سہولیات فراہم کی جائیں۔
ان کا کہنا تھا کہ سیاسی اختلافات کو بات چیت کے ذریعے حل کرنے کے لیے اقدامات ہونے چاہئیں۔ ایسی کوئی بیان بازی نہیں ہونی چاہیے جس سے ملک میں سیاسی درجہ حرارت مزید بڑھے۔
بیرسٹر گوہر نے کہا کہ اگر آگے بڑھنا ہے تو اس کی ابتدا عدالتی حکم پر عملدرآمد سے ہونی چاہیے۔
سپریم کورٹ کے فیصلے کا خیرمقدم کرتے ہیں: سہیل آفریدی
دریں اثنا وزیراعلیٰ خیبرپختونخوا سہیل آفریدی نے سپریم کورٹ میں سابق وزیراعظم عمران خان کے مقدمے کی سماعت کے موقع پر میڈیا سے گفتگو کرتے ہوئے سپریم کورٹ کے فیصلے کا خیرمقدم کیا۔
سہیل آفریدی نے کہا کہ سب سے پہلے اللہ تعالیٰ کا شکر ادا کرتے ہیں جو ہمارا خالق، مالک اور رازق ہے اور جس کے ہاتھ میں عزت و ذلت، زندگی اور موت ہے۔ انہوں نے کہا کہ اللہ تعالیٰ کا جتنا بھی شکر ادا کیا جائے کم ہے۔
وزیراعلیٰ خیبرپختونخوا نے کہا کہ سپریم کورٹ کے فیصلے نے 25 کروڑ پاکستانیوں کا عدلیہ پر اعتماد مزید مستحکم کیا ہے۔ عوام کی آخری امید عدلیہ ہے اور معزز ججز کے فیصلے نے انصاف کی اس امید کو مزید تقویت دی ہے۔
انہوں نے امید ظاہر کی کہ سپریم کورٹ کے فیصلے پر مکمل اور فوری عملدرآمد بھی یقینی بنایا جائے گا۔
کارکنوں سے صبر اور نظم و ضبط کا مظاہرہ کرنے کی اپیل
سہیل آفریدی نے کارکنوں اور عمران خان سے محبت کرنے والے شہریوں پر زور دیا کہ وہ صبر و تحمل، نظم و ضبط اور ذمہ داری کا مظاہرہ کریں۔
انہوں نے کہا کہ کارکن ایسا کوئی قدم نہ اٹھائیں جس سے عدلیہ، سپریم کورٹ کے فیصلے، عمران خان یا پاکستان تحریک انصاف کی ساکھ متاثر ہو۔
پی ٹی آئی رہنماؤں نے اس موقع پر سیاسی معاملات کو مذاکرات کے ذریعے حل کرنے اور عدالتی احکامات پر عملدرآمد کو ملک میں سیاسی کشیدگی کم کرنے کے لیے اہم قرار دیا۔
اہم نکات
- بیرسٹر گوہر نے سیاسی ہتھکنڈوں سے کسی کو مائنس کرنے کی مخالفت کردی۔
- پی ٹی آئی چیئرمین نے حکومت کو مذاکرات کی طرف بڑھنے کا مشورہ دیا۔
- عمران خان کی صحت پر سیاست نہ کرنے کا اعلان۔
- بشریٰ بی بی کو بھی ہسپتال منتقل کرکے طبی سہولیات دینے کا مطالبہ۔
- وزیراعلیٰ خیبرپختونخوا سہیل آفریدی نے سپریم کورٹ کے فیصلے کا خیرمقدم کیا۔
- کارکنوں سے صبر، تحمل، نظم و ضبط اور ذمہ داری کا مظاہرہ کرنے کی اپیل۔
