پنجاب کے حقوق پر سودا کرنے والے گلگت بلتستان کو کیا حقوق دیں گے؟ بلاول بھٹو کی ن لیگ پر کڑی تنقید

گلگت: چیئرمین پاکستان پیپلز پارٹی بلاول بھٹو زرداری نے کہا ہے کہ گلگت بلتستان کے عوام کے حقوق کے تحفظ اور حقِ ملکیت کے حصول کے لیے پیپلز پارٹی کو واضح اکثریت درکار ہے۔ انہوں نے کہا کہ جو عناصر پنجاب کے حقوق پر سودا کرنے کے لیے تیار ہیں، وہ گلگت بلتستان کے عوام کو کیا حقوق دیں گے۔

گلگت بلتستان میں ایک بڑے عوامی جلسے سے خطاب کرتے ہوئے بلاول بھٹو زرداری نے کہا کہ وہ گلگت سے ایسا مینڈیٹ چاہتے ہیں جس کی بنیاد پر اسلام آباد جا کر یہ مؤقف اختیار کیا جا سکے کہ کسی نئے صوبے کے قیام سے قبل گلگت بلتستان کے عوام کی آواز سنی جائے۔

گلگت بلتستان میں حقِ ملکیت کے لیے قانون سازی ضروری ہے

چیئرمین پیپلز پارٹی نے کہا کہ گلگت بلتستان کے عوام کو زمینوں کی ملکیت دلانے کے لیے جیالا وزیراعلیٰ اور پیپلز پارٹی کی حکومت ناگزیر ہے۔ انہوں نے کہا کہ اگر پیپلز پارٹی کو حکومت نہ ملی تو حقِ ملکیت سے متعلق قانون سازی اور اس پر عملدرآمد ممکن نہیں ہوگا۔

انہوں نے مزید کہا کہ قابلِ کاشت زمین کو قابلِ تقسیم بنایا جا چکا ہے اور اب اس زمین کو عوام تک پہنچانا ضروری ہے تاکہ مقامی لوگوں کو ان کا حق مل سکے۔

ن لیگ اور دیگر جماعتوں پر تنقید

بلاول بھٹو زرداری نے مسلم لیگ (ن) پر تنقید کرتے ہوئے کہا کہ جو لوگ پنجاب کے حقوق پر سمجھوتہ کرنے کے لیے تیار ہیں، وہ گلگت بلتستان کے حقوق کا تحفظ نہیں کر سکتے۔ انہوں نے دعویٰ کیا کہ دیگر سیاسی جماعتوں نے ماضی میں بھی پیپلز پارٹی کی قانون سازی میں رکاوٹیں ڈالیں۔

انہوں نے کہا کہ مخالف سیاسی جماعتوں کے پاس عوامی فلاح کا کوئی واضح نظریہ موجود نہیں جبکہ پیپلز پارٹی ہمیشہ عوامی حقوق، روزگار اور ترقی کی سیاست کرتی آئی ہے۔

پیپلز پارٹی روزگار دیتی ہے، مخالفین روزگار چھینتے ہیں

بلاول بھٹو نے کہا کہ پیپلز پارٹی کی تین نسلوں کا ریکارڈ گواہ ہے کہ انہوں نے نوجوانوں کے لیے روزگار کے مواقع پیدا کیے۔ انہوں نے الزام عائد کیا کہ دیگر جماعتیں لوگوں کو بے روزگار کرنے کی پالیسیوں پر عمل پیرا ہیں۔

انہوں نے کہا کہ سابق وزیراعظم محترمہ بینظیر بھٹو شہید کے خلاف بھی روزگار فراہم کرنے پر مقدمات بنائے گئے تھے، تاہم پیپلز پارٹی نے ہمیشہ عوامی خدمت کو ترجیح دی۔

18ویں ترمیم اور این ایف سی ایوارڈ سے صوبوں کو فائدہ پہنچا

چیئرمین پیپلز پارٹی کا کہنا تھا کہ 18ویں آئینی ترمیم اور این ایف سی ایوارڈ کے نتیجے میں چاروں صوبوں میں ترقی کے نئے مواقع پیدا ہوئے۔ ان کے مطابق 18ویں ترمیم کا سب سے زیادہ فائدہ صوبہ پنجاب کو ہوا۔

انہوں نے کہا کہ سابق صدر آصف علی زرداری نے ملک کو 18ویں ترمیم، سی پیک اور صوبائی خودمختاری جیسے اہم تحفے دیے جبکہ گلگت بلتستان کو بھی شناخت اور آئینی اہمیت دلانے میں کردار ادا کیا۔

گلگت بلتستان میں صحت اور سیاحت کے شعبوں میں بڑے منصوبوں کا اعلان

بلاول بھٹو زرداری نے کہا کہ پیپلز پارٹی اقتدار میں آکر گلگت بلتستان میں عالمی معیار کے اسپتال قائم کرے گی اور موجودہ ضلعی و تحصیل سطح کے اسپتالوں کو اپ گریڈ کیا جائے گا۔

انہوں نے کہا کہ سندھ میں این آئی سی وی ڈی کے تحت دنیا کی سب سے بڑی مفت علاج کی سہولت فراہم کی جا رہی ہے اور اسی طرز پر گلگت بلتستان میں بھی جدید طبی سہولیات فراہم کی جائیں گی۔

سیاحت کے حوالے سے انہوں نے کہا کہ پبلک پرائیویٹ پارٹنرشپ کے ذریعے گلگت بلتستان کو بین الاقوامی سیاحتی مرکز بنایا جائے گا اور سیاحوں کے لیے جدید سہولیات متعارف کرائی جائیں گی۔

بینظیر انکم سپورٹ پروگرام میں اضافے کا اعلان

جلسے سے خطاب کرتے ہوئے بلاول بھٹو زرداری نے آئندہ بجٹ میں بینظیر انکم سپورٹ پروگرام (BISP) کے فنڈز میں اضافے کا اعلان بھی کیا اور کہا کہ پیپلز پارٹی کمزور اور مستحق طبقات کی معاونت کے لیے اپنی پالیسیوں کو مزید مؤثر بنائے گی۔

انہوں نے دعویٰ کیا کہ آئندہ انتخابات میں ضلع غذر کی تینوں نشستیں پاکستان پیپلز پارٹی جیتے گی اور عوام کی حمایت سے گلگت بلتستان میں ترقی اور خوشحالی کا نیا دور شروع ہوگا۔