لاہور(بیورو چیف/سید ظہیر نقوی)لاہور اور قصور میں مبینہ پولیس مقابلوں کے دوران 7ملزم ہلاک ہوگئے۔ ذرائع کے مطابق کاہنہ کے علاقے میں سی سی اہلکار زیر حراست ملزمان کو ریکوری اور ساتھیوں کی نشاندہی کیلئے لے جا رہے تھے جہاں مبینہ طور پر ملزمان کے ساتھیوں نی گھات لگاکر پولیس پارٹی پر حملہ کیا، جس کے نتیجے میں زیر حراست ملزم عرفان اور آصف فائرنگ کی زد میں آکر مارے گئے ۔
دوسرا مبینہ مقابلہ گرین ٹائون کے علاقے میں ہوا جہاں سی سی ڈی صدر ڈویژن کے اہلکار زیر حراست 2ملزمان شاہد اور بلال کو گرین ٹائون ریکوری کیلئے لے جا رہے تھی پولیس کے پہنچنے پر نامعلوم حملہ آوروں نے اندھا دھند فائرنگ کردی جس کے نتیجے میں دونوں زیر حراست ملزمان گولیاں لگنے سے موقع پر دم توڑ گئے جبکہ حملہ آور فرار ہونے میں کامیاب ہوگئے۔پولیس ذرائع کے مطابق چاروں ملزمان دوران ڈکیتی اور مزاحمت کے دوران گولیاں چلانے کے واقعات میں ملوث تھے۔
شاہدرہ میں پولیس کانسٹیبل کے قتل میں ملوث ملزمان مبینہ پولیس مقابلے میں ہلاک ہوئے ۔ذرائع کے مطابق ملزمان نے 2019ء میں ہیڈ کانسٹیبل اشفاق کو منشیات فروشی کی مخبری کرنے پر قتل کیا تھا۔ وقوعہ کے بعد ملزمان مبینہ طور پر اثرورسوخ کی وجہ سے قانون کی گرفت سے بچتے رہے۔
سی سی ڈی حکام کے مطابق ہلاک ہونے والے دونوں شوٹرزکی شناخت عمران بٹ اور عامر بٹ کے نام سے ہوئی ہے۔حکام کا مزید کہنا ہے کہ ملزمان کو نشاندہی کیلئے لے جایا جا رہا تھا کہ اسی دوران ان کے ساتھیوں نے فائرنگ کر دی، جس کے نتیجے میں دونوں ملزمان ہلاک ہو گئے۔قصور بائی پاس کے قریب مبینہ پولیس مقابلے میں ایک ڈاکو ہلاک ہو گیا۔ پولیس حکام نے بتایا کہ مرنے والا ڈاکو اپنے ہی ساتھیوں کی مبینہ فائرنگ سے ہلاک ہوا، مرنے والے ڈاکو کی شناخت 30 سالہ جنید کے نام سے ہوئی ہے۔
