وکلا کیخلاف مقدمات میں کمی کے بجائے اضافہ،پنجاب بارکا پیر کو ہڑتال کا اعلان

لاہور:( کورٹ رپورٹر)پنجاب بار کونسل کی کال پر وکلاء پرجھوٹی ایف آئی آرز کے اندراج کے خلاف پیر18اگست کو ماتحت عدالتوں میں ہڑتال کی جائے گی ۔ پنجاب بار کونسل کے وائس چیئرمین چودھری محمد اشفاق کہوٹ نے کہا کہ پنجاب بھر میں وکلا ء کے خلاف جھوٹی اور من گھڑٹ ایف آئی آرز کے اندراج اورغیر قانونی گرفتاریاں پر حکومت کو 16 اگست تک کا وقت دیا گیا تھا کہ اس سلسلے کو فی الفور روکا جائے اور وکلا ء پر تمام کیسز ختم کئے جائیں لیکن حکومت نے اس پر کوئی نوٹس نہیں لیا بلکہ کئی اضلاع میں مزید وکلاء کے خلاف مزید ایف آئی آرز درج کر لی گئیں۔

پنجاب بار کونسل کی کال پرآج پیر18 اگست کو ہڑتال کرتے ہوئے عدالتوں کا مکمل بائیکاٹ کیاجائے گا ۔انہوں نے واضح کیا کہ اگر حکومت ہماری پر امن ہڑتال کی کال کو خاطر میں نہ لائی تو اگلے مرحلے میں ملک بھر میں ہڑتال کی کال دی جائے گی اور عدالتوں کا مکمل بائیکاٹ کیا جائے گا ۔

اس موقع پر چیئرمین ایگزیکٹو کمیٹی پنجاب بار کونسل ذبیح اﷲ ناگرہ،سابق وائس چیئرمینز عرفان تارڑ،چودھری بابر وحید،کامران بشیر مغل،فرحان شہزاد سیکرٹری پنجاب بار کونسل رفاقت علی سوہل،اکائونٹس آفیسر رانا محمد عمیر دیگر بھی موجود تھے۔

چودھری محمد اشفاق کہوٹ نے مزید کہا کہ ہم پر امن رہ کر اپنا احتجاج نوٹ کرائیں گے ،آئی جی پنجاب سے مطالبہ کیا ہے کہ وہ تمام بے بنیاد اور من گھڑت ایف آئی آرز واپس لیں اور وکلاء کے خلاف انتقامی کارروائیاں بند کرائی جائیں۔