فرانس،جرمنی،سپین ،اٹلی میں شدیدگرمی،دریا،نہروں میں نہاتے ڈوب کردرجنوں افراد ہلاک

پیرس:(ویب ڈیسک)فرانس میں ہیٹ ویو جاری ہے جس کے باعث گزشتہ جمعرات سے اب تک دریاؤں اور نہروں میں نہانے کے دوران ڈوبنے کے واقعات میں 40 افراد ہلاک ہو چکے ہیں۔

فرانس کے کئی بڑے شہروں میں درجہ حرارت ریکارڈ سطح تک پہنچ گیا ہے اور یورپ کے مختلف ممالک میں گرمی کی لہر اپنے عروج پر ہے۔

فرانس کے وزیر برائے کھیل و امور نوجوانان مارینا فراری نے فرانسیسی ریڈیو سے گفتگو کرتے ہوئے خبردار کیا کہ ’ہیٹ ویو کے دوران غیر محفوظ مقامات پر تیراکی کو معمولی نہ سمجھا جائے‘۔

فرانس کے ساتھ ساتھ اسپین اور اٹلی بھی اس شدید گرمی لہر سے سب سے زیادہ متاثر ہونے والے ممالک میں شامل ہیں۔

فرانس کے محکمہ موسمیات کے مطابق پیر کے روز فرانس میں جون کا گرم ترین دن ریکارڈ کیا گیا۔

فرانس میں گرمی کی شدید لہر، پیرس کے اسٹور میں 30 منٹ میں تمام پنکھے فروخت ہوگئے

فرانس کے وزیر کھیل نے کہا کہ بہت زیادہ لوگ گرمی سے بچنے کے لیے دریاؤں اور نہروں میں نہا رہے ہیں لیکن وہ اس سے جڑے خطرات کو سنجیدگی سے نہیں لے رہے۔

دوسری جانب جرمنی میں بھی کئی افراد ڈوب کر ہلاک ہو چکے ہیں اور وہاں بھی ہفتے کے اختتام تک درجہ حرارت 40 ڈگری سینٹی گریڈ تک پہنچنے کی توقع ہے۔

جرمن لائف سیونگ ایسوسی ایشن کے مطابق جمعے سے اتوار کے درمیان تیراکی کے دوران کم از کم 6 ہلاکتیں رپورٹ ہوئیں۔