بھارت نے پانی روکا تو بھاری قیمت چکانا پڑے گی: راجہ پرویز اشرف

لاہور(بیورو چیف )پاکستان پیپلز پارٹی وسطی پنجاب کے صدر راجہ پرویز اشرف نے کہا ہے کہ پاکستان اپنے آبی وسائل کے تحفظ کے لیے ہر ممکن اقدام کرے گا اور اگر بھارت نے پاکستان کا پانی روکنے کی کوشش کی تو اسے اس کی بھاری قیمت چکانا پڑے گی۔ انہوں نے کہا کہ پانی پاکستان کی لائف لائن ہے اور اسے روکنے کی کسی بھی کوشش کو برداشت نہیں کیا جائے گا۔

وہ پاکستان پیپلز پارٹی وسطی پنجاب کے جنرل سیکرٹری سید حسن مرتضیٰ کے ہمراہ پیپلز سیکرٹریٹ، ماڈل ٹاؤن لاہور میں پریس کانفرنس سے خطاب کر رہے تھے۔

سندھ طاس معاہدہ یکطرفہ معطل نہیں کیا جا سکتا

راجہ پرویز اشرف نے کہا کہ بھارت سندھ طاس معاہدے کے حوالے سے غیر ذمہ دارانہ رویہ اختیار کر رہا ہے، حالانکہ وہ اس معاہدے کو یکطرفہ طور پر معطل نہیں کر سکتا۔

انہوں نے کہا کہ بھارت کا مؤقف غیر منطقی ہے اور عالمی سطح پر بھی ایسے اقدامات کو قانونی جواز حاصل نہیں۔

پاکستان امن پسند ریاست ہے

انہوں نے کہا کہ پاکستان ایک ذمہ دار اور امن پسند ریاست کے طور پر دنیا میں اپنا مثبت کردار ادا کر رہا ہے۔ ان کے مطابق ایران اور امریکہ کے درمیان کشیدگی میں کمی اور جنگ بندی کی کوششوں میں پاکستان نے اہم سفارتی کردار ادا کیا، جس میں وزیراعظم شہباز شریف اور فیلڈ مارشل کا بھی اہم حصہ رہا۔

قومی اتحاد وقت کی ضرورت قرار

راجہ پرویز اشرف نے کہا کہ دہشت گرد عناصر پاکستان کے امن و استحکام کو نقصان پہنچانے کی کوشش کر رہے ہیں، اس لیے تمام سیاسی جماعتوں اور قوم کو متحد ہو کر ملک کے مفاد میں کردار ادا کرنا چاہیے۔

انہوں نے کہا کہ جہاں امن ہوگا، وہاں سیاسی اور معاشی استحکام بھی ممکن ہوگا۔

میڈیا سے تصدیق کے بعد خبر نشر کرنے کی اپیل

انہوں نے میڈیا پر زور دیا کہ کسی بھی خبر کی اشاعت یا نشر سے قبل اس کی مکمل تصدیق کی جائے تاکہ افواہوں اور غلط اطلاعات کی روک تھام ممکن ہو سکے۔

کشمیر پر مؤقف اور بلاول بھٹو کا دورہ

راجہ پرویز اشرف نے کہا کہ آزاد جموں و کشمیر میں شفاف انتخابات ہی عوامی مسائل کے حل کی بنیاد بن سکتے ہیں۔ انہوں نے بتایا کہ پاکستان پیپلز پارٹی کے چیئرمین بلاول بھٹو زرداری جلد آزاد کشمیر کا دورہ کریں گے۔

انہوں نے کہا کہ شہید ذوالفقار علی بھٹو، محترمہ بے نظیر بھٹو شہید اور صدر آصف علی زرداری سمیت پیپلز پارٹی کی قیادت کا کشمیر کے ساتھ تاریخی تعلق ہے اور پارٹی مسئلہ کشمیر پر کسی قسم کا سمجھوتہ نہیں کرے گی۔

سیاسی مکالمے پر زور

راجہ پرویز اشرف نے کہا کہ سیاسی اختلافات کا حل پارلیمان اور مذاکرات کے ذریعے نکالا جانا چاہیے۔ انہوں نے کہا کہ ہر سیاسی جماعت کو انتخابات میں حصہ لینے کا آئینی اور جمہوری حق حاصل ہے، اس لیے کسی بھی جماعت پر پابندی کی حمایت نہیں کی جا سکتی۔

انہوں نے تحریک انصاف کی قیادت اور کارکنوں پر بھی زور دیا کہ سیاسی مکالمے کے دروازے بند نہ کیے جائیں۔

25 جولائی کو مینارِ پاکستان میں جلسے کا اعلان

انہوں نے بتایا کہ پاکستان پیپلز پارٹی 25 جولائی کو مینارِ پاکستان لاہور میں جلسہ منعقد کرے گی، جس کی تیاریاں جاری ہیں۔

اس موقع پر جنرل سیکرٹری پیپلز پارٹی وسطی پنجاب سید حسن مرتضیٰ نے بتایا کہ پارٹی میں تنظیم سازی کا عمل جاری ہے، آزاد کشمیر انتخابات کے لیے خصوصی الیکشن سیل قائم کر دیا گیا ہے اور مختلف اضلاع میں ورکرز کنونشنز منعقد کیے جا رہے ہیں۔