لوگ کشمیر میں شہید ہو رہے ہیں،بلاو ل کا بڑا اعتراف؟،انتخابی نتائج ماننے سے انکار

مظفرآباد:(نیٹ نیوز) چیئرمین پیپلز پارٹی بلاول بھٹو زرداری نے کہا کہ اس وقت جو لوگ کشمیر میں شہید ہو رہے ہیں اس کا حل پیپلز پارٹی کے پاس موجود ہے، ہمیں اس پر کمیشن قائم کرنا چاہیے، احتجاج کرنے والوں کو کمیشن کے فیصلے تک انتظار کرنا چاہیے۔

آزاد کشمیر الیکشن نتائج پر پاکستان پیپلز پارٹی اور مسلم لیگ (ن) میں گرما گرمی بڑھ گئی، بلاول بھٹو زرداری نے آزاد کشمیر کے الیکشن نتائج کو تسلیم کرنے سے انکار کر دیا۔

مظفر آباد میں ورکرز کنونشن سے خطاب کرتے ہوئے چیئرمین پیپلز پارٹی بلاول بھٹو زرداری نے کہا کہ ہم چودھری یاسین کے حلقے میں دھاندلی کے نتائج کیوں تسلیم کریں؟ 30 پولنگ اسٹیشنز پر قبضہ کرنے اور ٹھپے لگانے کے ویڈیو ثبوت موجود ہیں۔

انہوں نے کہا کہ ان 30 پولنگ اسٹیشنز پر 90 فیصد ٹرن آوٴٹ ہے، چودھری یاسین کے حلقے میں ری پولنگ کرائی جائے۔

بلاول بھٹو زرداری نے کہا کہ ٹروتھ اور مفاہمتی کمیشن بنا کر دودھ کا دودھ اور پانی کا پانی کیا جائے، کشمیری عوام کے ووٹ پر کسی کو ڈاکا نہیں ڈالنے دیں گے، یقین دلاتا ہوں ہر چوری او ر چھینی ہوئی نشست ان سے واپس دلائیں گے۔

چیئرمین پاکستان پیپلز پارٹی کا مزید کہنا تھا کہ میں کشمیر کے عوام کو حق ملکیت دلانا چاہتا ہوں، میں یہ حقوق بندوق کے زور پر نہیں لوں گا، میں سڑکیں بند کرکے نہیں الیکشن جیت کر عوام کو حقوق دلاوٴں گا۔