اسلام آباد: Shehbaz Sharif نے کہا ہے کہ پاکستان کو ایٹمی طاقت بنانے کے بعد اب ملک کو معاشی طاقت بنانا قومی مشن ہے اور حکومت اس مقصد کے حصول کے لیے دن رات کام کر رہی ہے جبکہ ان کوششوں کے نتائج آہستہ آہستہ سامنے آ رہے ہیں۔
وفاقی کابینہ اجلاس سے خطاب کرتے ہوئے وزیراعظم نے کہا کہ پاکستان کی ایٹمی صلاحیت ملک کا دفاعی اثاثہ ہے جو رہتی دنیا تک محفوظ رہے گی۔ انہوں نے کہا کہ پوری قوم نے 10 مئی کو ’’معرکہ حق‘‘ کی سالگرہ بھرپور جذبے کے ساتھ منائی اور افواج پاکستان نے دشمن کو ایسا جواب دیا جو ہمیشہ یاد رکھا جائے گا۔
وزیراعظم نے کہا کہ پاکستان کا ایٹمی پروگرام صرف دفاعی مقاصد کے لیے ہے، جارحیت کے لیے نہیں، اسی وجہ سے دنیا پاکستان کو ایک ذمہ دار ایٹمی طاقت تسلیم کرتی ہے۔ انہوں نے ایٹمی پروگرام کے بانی Zulfikar Ali Bhutto اور سابق وزیراعظم Nawaz Sharif سمیت تمام سائنسدانوں، اداروں اور قومی ہیروز کو خراج تحسین پیش کیا۔
شہباز شریف نے کہا کہ معاشی استحکام کا سفر مشکل ضرور ہے لیکن جو قومیں مشکلات کا مقابلہ کرنے کا فیصلہ کر لیں، کامیابی انہی کا مقدر بنتی ہے۔ انہوں نے کہا کہ خطے میں کشیدگی کے باوجود پاکستان نے دیگر ممالک کے مقابلے میں بہتر انداز میں صورتحال کا سامنا کیا۔
وزیراعظم نے دہشت گردی کے خلاف قربانیاں دینے والے سکیورٹی اداروں اور شہریوں کو خراج عقیدت پیش کرتے ہوئے ریلوے ملازم لیاقت کو قومی ہیرو قرار دیا، جس نے دہشت گرد کو روکنے کی کوشش میں اپنی جان قربان کی۔
کابینہ کے اہم فیصلے
وفاقی کابینہ نے حج پالیسی 2027-2030 کی منظوری دیتے ہوئے وزارت مذہبی امور اور پرائیویٹ حج آپریٹرز کے احتساب کا مؤثر نظام بنانے کی ہدایت کی۔ کابینہ نے اسلام آباد کے فراش ٹاؤن میں کم لاگت ہاؤسنگ منصوبے کی منظوری بھی دی۔
اس کے علاوہ گندم خریداری سے متعلق مسائل کے حل کے لیے کابینہ کمیٹی قائم کی گئی جبکہ پاکستان کسٹمز افسران کے ترقیاتی امتحانات فیڈرل پبلک سروس کمیشن کے ذریعے کرانے کی منظوری دی گئی۔
نیشنل پاپولیشن کونسل قائم کرنے کا فیصلہ
وزیراعظم نے بڑھتی ہوئی آبادی کو قومی ترقی کے لیے بڑا چیلنج قرار دیتے ہوئے نیشنل پاپولیشن کونسل قائم کرنے کا اعلان کیا۔ کونسل میں چاروں صوبوں کے وزرائے اعلیٰ، وزیراعظم آزاد کشمیر اور وزیراعلیٰ گلگت بلتستان شامل ہوں گے۔
انہوں نے کہا کہ وسائل اور آبادی میں توازن ہی پائیدار ترقی کی ضمانت ہے جبکہ عوامی آگاہی مہم میں علمائے کرام اور کمیونٹی رہنماؤں کو بھی شامل کیا جائے گا۔
ہاؤسنگ اور ویسٹ ٹو انرجی منصوبے
وزیراعظم نے کم آمدنی والے طبقے کے لیے سستے گھروں کی فراہمی کو حکومت کی ترجیح قرار دیتے ہوئے ہاؤسنگ سیکٹر میں اصلاحات اور ڈیجیٹلائزیشن پر زور دیا۔
وفاقی حکومت نے ’’ویسٹ ٹو انرجی‘‘ منصوبوں کے فروغ کے لیے قومی ٹاسک فورس بنانے کی منظوری بھی دی، جو فضلے سے توانائی پیدا کرنے کے منصوبوں، سرمایہ کاری اور نئی قومی پالیسی پر کام کرے گی۔
آذربائیجان کے وزیر انصاف کی ملاقات
دریں اثنا آذربائیجان کے وزیر انصاف Farid Ahmadov نے وزیراعظم شہباز شریف سے ملاقات کی، جس میں دونوں ممالک کے درمیان قانونی اور عدالتی تعاون کو مزید فروغ دینے پر اتفاق کیا گیا۔
