لاہور/سرگودھا (زبیر اسلم خان) امیر جماعت اسلامی پاکستان Hafiz Naeem ur Rehman نے کہا ہے کہ شہریوں کو تعلیم، صحت، امن اور انصاف فراہم کرنا ریاست کی بنیادی ذمہ داری ہے، مگر گزشتہ 78 برس سے حکومتیں یہ فرض ادا کرنے میں ناکام رہی ہیں۔
سرگودھا میں "بنو قابل” تقریب سے خطاب کرتے ہوئے انہوں نے کہا کہ ملک میں تقریباً اسی لاکھ نوجوان منشیات کی لت کا شکار ہیں، جبکہ بچوں کو اسکول بھیجنے کے بجائے پنجاب حکومت تعلیمی اداروں کو فروخت کرنے میں مصروف ہے۔
تقریب Alkhidmat Foundation Pakistan کے زیر اہتمام منعقد ہوئی، جس میں ایک ہزار سے زائد طلبہ و طالبات نے شرکت کی۔ اس موقع پر امیر ضلع اویس قاسم سمیت جماعت اسلامی اور الخدمت کے ذمہ داران بھی موجود تھے۔
حافظ نعیم الرحمان نے "بنو قابل” پروگرام کو گیم چینجر قرار دیتے ہوئے کہا کہ اب تک 14 لاکھ سے زائد طلبہ رجسٹرڈ ہو چکے ہیں، جن میں 40 فیصد بچیاں شامل ہیں۔ ان کا کہنا تھا کہ یہ اس بات کا ثبوت ہے کہ درست پالیسی اور نیت کے ساتھ نوجوانوں کو باصلاحیت بنایا جا سکتا ہے۔
انہوں نے سوال اٹھایا کہ جب جماعت اسلامی اور الخدمت نوجوانوں کو تعلیم فراہم کر سکتے ہیں تو ریاست یہ ذمہ داری کیوں پوری نہیں کر رہی؟ ان کے مطابق سرکاری شعبے میں بھی تعلیم مسلسل مہنگی ہو رہی ہے اور نظام تعلیم طبقاتی اور استحصالی بن چکا ہے۔
انہوں نے کہا کہ سرگودھا میں صرف 20 فیصد افراد میٹرک تک تعلیم حاصل کر پاتے ہیں جبکہ پانچ سے پندرہ سال کے ایک لاکھ بچے اسکولوں سے باہر ہیں، جو لمحہ فکریہ ہے۔ پنجاب میں ایک کروڑ سے زائد بچے اسکول نہیں جاتے۔
امیر جماعت اسلامی کا کہنا تھا کہ صوبے میں اسکولوں اور بنیادی صحت کے مراکز کو فروخت کیا جا رہا ہے جبکہ آئی ٹی تعلیم کے فروغ کے لیے کوئی جامع حکمت عملی موجود نہیں۔ انہوں نے کہا کہ اگر نوجوانوں کو آئی ٹی تعلیم دی جائے تو ملک کا قرضہ اتارا جا سکتا ہے۔
انہوں نے حکومت پر تنقید کرتے ہوئے کہا کہ کسان، مزدور اور تنخواہ دار طبقہ شدید مشکلات کا شکار ہے جبکہ عملی اقدامات نہ ہونے کے برابر ہیں۔
حافظ نعیم الرحمان نے کہا کہ ہر غریب شہری پٹرولیم لیوی اور دیگر ٹیکسوں کا بوجھ اٹھا رہا ہے جبکہ بجلی کے بل گھروں کے کرایوں سے بھی زیادہ آ رہے ہیں۔
انہوں نے زور دیا کہ ملک میں حقیقی تبدیلی کے لیے موجودہ نظام کو بدلنا ہوگا کیونکہ اسی نظام کے تحت مسائل کا حل ممکن نہیں۔
آخر میں انہوں نے نوجوانوں کو مخاطب کرتے ہوئے کہا کہ وہ اس جدوجہد کا حصہ بنیں، جماعت اسلامی انہیں تعلیم اور مہارت فراہم کر کے ملک کو درست سمت میں لے جانے کے لیے تیار کرے گی۔
