یہ حقیقت کسی سے پوشیدہ نہیں کہ پاکستان میں بچوں سے مزدوری لینے کا مسئلہ اب محض ایک سماجی انحراف نہیں رہا بلکہ ایک منظم معاشرتی اور معاشی بحران کی شکل اختیار کر چکا ہے۔ ملک کے طول و عرض میں لاکھوں بچے ایسے ہیں جو گھریلو ملازمتوں، ورکشاپوں، ہوٹلوں، اینٹوں کے بھٹوں، کھیتوں اور دیگر غیر رسمی شعبوں میں دن رات مصروف عمل ہیں۔ یہ بچے اپنی معصومیت کے دنوں میں وہ بوجھ اٹھا رہے ہیں جو ان کے کندھوں کے لیے نہیں تھا۔ ان کی موجودگی نہ صرف انسانی ترقی کے اشاریوں کو متاثر کر رہی ہے بلکہ آنے والے برسوں میں معاشرتی ڈھانچے کو بھی کمزور کر رہی ہے۔ یہ محض جذباتیت یا دکھ بھری داستانوں کا معاملہ نہیں بلکہ ایک ایسا مسئلہ ہے جو عملی تجزیے، اعداد و شمار کی بنیاد اور ٹھوس حکمت عملی کا تقاضا کرتا ہے۔پاکستان میں چائلڈ لیبر کا موضوع قانون سازی کے حوالے سے کوئی نیا نہیں۔ 1991 میں ’’بچوں کے روزگار کا قانون‘‘ متعارف کرایا گیا تھا جس کے تحت چودہ سال سے کم عمر بچوں کو کسی بھی صنعتی یا خطرناک نوعیت کے کام پر رکھنے پر پابندی عائد کی گئی۔ اس کے بعد مختلف صوبوں نے اپنی اپنی سطح پر اقدامات کیے۔ پنجاب نے 2019 میں ’’گھریلو ملازمین ایکٹ‘‘ نافذ کیا جس میں پندرہ سال سے کم عمر بچوں کی گھریلو ملازمت ممنوع قرار دی گئی اور پندرہ سے اٹھارہ سال تک کے بچوں کو محدود نوعیت کے کام کی اجازت دی گئی بشرطیکہ ان کی تعلیم اور صحت متاثر نہ ہو۔ سندھ نے 2017 میں ’’بچوں کے روزگار پر پابندی کا قانون‘‘ بنایا، خیبر پختونخوا نے ’’چائلڈ لیبر فری زون پالیسی‘‘ اپنائی اور بلوچستان نے 2021 میں ’’جبری مشقت کے خاتمے کا قانون‘‘ نافذ کیا۔ پاکستان نے انٹرنیشنل لیبر آرگنائزیشن کے کنونشن 138 اور 182 پر بھی دستخط کر رکھے ہیں جو عالمی سطح پر کم عمر مزدوری اور خطرناک کاموں میں بچوں کے استعمال پر پابندی عائد کرتے ہیں۔مگر یہ سوال اپنی جگہ قائم ہے کہ قوانین کی موجودگی کے باوجود ان پر عمل درآمد کیوں نہیں ہوتا۔ زمینی حقائق کچھ اور کہانی سناتے ہیں۔ اکثر اوقات قانون صرف کاغذوں کی حد تک محدود رہتا ہے۔ پولیس میں شکایات درج ہوتی ہیں مگر بیشتر مقدمات منطقی انجام تک نہیں پہنچ پاتے۔ عدالتی کارروائیاں برسوں کھنچتی رہتی ہیں اور متاثرہ بچے یا ان کے والدین انصاف کی دہلیز پر طویل انتظار میں رہ جاتے ہیں۔ بعض اوقات طاقتور طبقہ اپنے سماجی اور مالی اثر و رسوخ کے ذریعے ان مقدمات کو دبا دیتا ہے اور قانون اپنی افادیت کھو بیٹھتا ہے۔ یوں معاشرہ ایک ایسے گرداب میں پھنس جاتا ہے جہاں جرم کی حوصلہ شکنی کے بجائے اس کی تکرار میں اضافہ ہوتا ہے۔اعداد و شمار اس المیے کو مزید واضح کرتے ہیں۔ 2025 کے تازہ ترین اعداد و شمار کے مطابق سندھ میں پانچ سے سترہ سال کی عمر کے کم از کم ایک اعشاریہ چھ ملین بچے مزدوری پر مجبور ہیں جن میں سے پچاس اعشاریہ چار فیصد بچے خطرناک حالات میں کام کرتے ہیں۔ ان کی اسکول حاضری صرف چالیس اعشاریہ چھ فیصد ہے جبکہ انہی عمر کے غیر محنت کش بچوں کی اسکول حاضری ستر اعشاریہ پانچ فیصد ہے۔ پنجاب میں پانچ سے سترہ سال کے بچوں میں چائلڈ لیبر کی شرح سولہ اعشاریہ نو فیصد ہے اور خطرناک کاموں میں یہ شرح سینتالیس اعشاریہ آٹھ فیصد تک پہنچ چکی ہے۔ خیبر پختونخوا میں یہ شرح گیارہ اعشاریہ ایک فیصد ہے یعنی کم از کم نو لاکھ بائیس ہزار تین سو چودہ بچے کام میں مصروف ہیں اور ان میں سے تہتر اعشاریہ آٹھ فیصد خطرناک حالات میں مزدوری کر رہے ہیں۔ مجموعی طور پر پاکستان میں بارہ سے تیرہ ملین کے درمیان بچے مختلف شعبوں میں مشقت کرتے ہیں جن میں کھیت، بھٹے، قالین بافی، ہوٹل، دکانیں اور گھریلو ملازمت سب شامل ہیں۔ گھریلو ملازمت کے حوالے سے بھی صورتحال افسوسناک ہے کیونکہ اندازوں کے مطابق ہر چار میں سے ایک گھرانہ کسی نہ کسی شکل میں بچوں کی مزدوری پر انحصار کرتا ہے۔یہ صورتحال اس بات کی غمازی کرتی ہے کہ قوانین کے باوجود عملی سطح پر بچوں کو مشقت سے بچانے کے اقدامات ناکافی ہیں۔ یہ بچے نہ صرف اپنی تعلیم سے محروم رہتے ہیں بلکہ ان کی جسمانی اور ذہنی نشونما بھی متاثر ہوتی ہے۔ کئی بچے جسمانی تشدد اور نفسیاتی استحصال کا شکار ہوتے ہیں۔ بعض کیسز میں یہ استحصال جان لیوا بھی ثابت ہوتا ہے۔ قانون کے مطابق چودہ سال سے کم عمر بچے سے مشقت لینا جرم ہے جس کی سزا قید، جرمانہ یا دونوں ہو سکتی ہیں۔ پنجاب کے قانون کے تحت ایک سال تک قید اور کم از کم پچاس ہزار روپے جرمانہ تجویز کیا گیا ہے اور بعض صورتوں میں یہ سزا تین سال تک بڑھ سکتی ہے مگر حقیقت یہ ہے کہ سزا پانے والوں کی تعداد نہ ہونے کے برابر ہے۔چائلڈ لیبر کے فروغ کی بنیادی وجوہات میں غربت، آبادی کا تیز رفتار اضافہ، تعلیم تک محدود رسائی، والدین کی معاشی مجبوری اور ریاستی اداروں کی غیر فعالیت شامل ہیں۔ بیشتر والدین محدود آمدنی کے باعث اپنے بچوں کو محنت پر بھیجنے پر مجبور ہیں کیونکہ ان کے نزدیک یہ فوری معاشی سہارا ہے۔ دوسری طرف ایسے بچوں کو ملازمت دینے والوں کی مستقل طلب موجود ہے کیونکہ وہ کم اجرت پر زیادہ اوقات کار والے ملازمین چاہتے ہیں۔ یہ طلب اور رسد کا توازن اس مسئلے کو جوں کا توں رکھے ہوئے ہے۔اس مسئلے کے حل کے لیے محض قانون سازی کافی نہیں بلکہ اس پر مؤثر عمل درآمد ناگزیر ہے۔ ریاستی اداروں کو اپنی کارکردگی بہتر بنانی ہو گی۔ چائلڈ لیبر کے خلاف منظم مہمات چلائی جائیں، متعلقہ اداروں کو فعال بنایا جائے اور ایسے مالکان کے خلاف فوری اور شفاف کارروائی کی جائے جو بچوں سے مشقت لیتے ہیں۔ عدلیہ کو چاہیے کہ ان مقدمات کو ترجیحی بنیادوں پر نمٹائے تاکہ متاثرہ بچوں کو بروقت انصاف مل سکے۔سماجی رویوں میں تبدیلی بھی اس مسئلے کے حل کے لیے نہایت اہم ہے۔ بچوں کی مشقت کو محض قانونی جرم نہیں بلکہ معاشرتی برائی کے طور پر دیکھنے کی ضرورت ہے۔ جب تک معاشرت میں اس عمل کو برا نہیں سمجھا جائے گا اس وقت تک قانون بھی اپنی پوری قوت کے ساتھ اس کا سدباب نہیں کر سکے گا۔ عوام میں شعور بیدار کرنے کی ضرورت ہے تاکہ لوگ یہ سمجھیں کہ اگر کوئی بچہ گھریلو ملازمت کر رہا ہے یا ہوٹل پر برتن دھو رہا ہے تو وہ صرف کام نہیں کر رہا بلکہ اپنی تعلیم اور مستقبل کی قیمت ادا کر رہا ہے۔مزید یہ کہ اس مسئلے کے حل کے لیے بحالی کے پروگرام ناگزیر ہیں۔ ان بچوں کے لیے تعلیم، صحت اور نفسیاتی معاونت فراہم کرنے والے مراکز قائم کیے جائیں تاکہ وہ دوبارہ تعلیمی دائرے میں واپس آ سکیں۔ والدین کے لیے روزگار کے بہتر مواقع پیدا کیے جائیں تاکہ وہ اپنے بچوں کو مزدوری پر مجبور نہ کریں۔ سماجی تنظیموں، غیر سرکاری اداروں اور بین الاقوامی شراکت داروں کو بھی اس عمل میں شامل کیا جانا چاہیے تاکہ وسائل کی کمی دور ہو اور پالیسیوں کو مؤثر طریقے سے نافذ کیا جا سکے۔پاکستان میں بچوں کی مزدوری کا خاتمہ کسی ایک وقتی اقدام سے ممکن نہیں۔ یہ ایک طویل المدتی عمل ہے جس کے لیے مستقل مزاجی، مربوط حکمت عملی اور تمام متعلقہ فریقین کی شمولیت ضروری ہے۔ حکومت کو اپنی ذمہ داریاں نبھانی ہوں گی، عدلیہ کو بروقت فیصلے دینے ہوں گے، پولیس کو شفاف کارروائیاں کرنی ہوں گی اور معاشرہ مجموعی طور پر اس رویے کے خلاف کھڑا ہونا ہوگا۔ بصورت دیگر یہ مسئلہ نہ صرف انسانی حقوق کی سنگین خلاف ورزی کے طور پر باقی رہے گا بلکہ ملک کی معاشرتی اور معاشی ترقی کی راہ میں ایک بڑی رکاوٹ بھی بنے گا۔آج جو بچے مزدوری پر مجبور ہیں وہ کل محرومی اور استحصال کے احساس کے ساتھ بالغ ہوں گے۔ یہ احساس ان کی نفسیاتی نشونما پر منفی اثر ڈالے گا اور معاشرے میں جرائم اور بے چینی کو بڑھا سکتا ہے۔ اس لیے ضروری ہے کہ فوری اقدامات کے ساتھ ساتھ طویل المدتی اصلاحات بھی کی جائیں تاکہ آنے والی نسلیں اس بوجھ سے آزاد ہو سکیں۔ یہ محض ایک اخلاقی ذمہ داری نہیں بلکہ قومی ترقی اور سماجی استحکام کے لیے بھی ناگزیر ہے۔اگر پاکستان سنجیدگی کے ساتھ غربت کے خاتمے، تعلیم کے فروغ، قانون کے نفاذ اور سماجی شعور کی بیداری پر کام کرے تو یہ مسئلہ رفتہ رفتہ کم ہو سکتا ہے۔ دنیا کے کئی ممالک نے بچوں کی مشقت پر قابو پایا ہے اور اس میں حکومت، سماجی اداروں اور عوامی تعاون نے کلیدی کردار ادا کیا۔ پاکستان بھی اس راستے پر گامزن ہو سکتا ہے بشرطیکہ یہ مسئلہ جذباتیت کی بجائے تجزیے، منصوبہ بندی اور عملی اقدامات کے ذریعے حل کرنے کی سنجیدہ کوشش کی جائے۔
