صنعتی ترقی سندھ حکومت کی اولین ترجیح : مراد علی شاہ

کراچی: (ویب ڈیسک ) وزیراعلیٰ سندھ سید مراد علی شاہ نے صنعتی ترقی کو تیز کرنے، انفراسٹرکچر کو مضبوط بنانے اور کاروبار دوست ماحول کے فروغ کے لیے اپنی حکومت کے عزم کا اعادہ کرتے ہوئے کہا کہ سٹریٹجک رابطہ منصوبے، بہتر امن و امان اور مسلسل سرکاری سرمایہ کاری صوبے بھر میں سرمایہ کاری، روزگار کے مواقع اور معاشی ترقی کی بنیاد رکھ رہے ہیں۔

انہوں نے کہا کہ شہید بھٹو ایکسپریس وے کو کراچی پورٹ سے منسلک کرنا تجارت اور صنعت کے لیے ایک انقلابی پیش رفت ثابت ہوگا جبکہ عوامی خدمت، شفافیت اور عوام دوست طرز حکمرانی ان کی حکومت کے بنیادی اصول ہیں۔

وزیراعلیٰ نے یہ باتیں کراچی ایسوسی ایشن آف ٹریڈ اینڈ انڈسٹری (کاٹی) کی جانب سے انڈس اسپتال نیٹ ورک کے بانی ڈاکٹر عبدالباری خان کی صحت کے شعبے میں شاندار خدمات کے اعتراف میں منعقدہ تقریب سے خطاب کرتے ہوئے کہیں۔کاٹی ہیڈکوارٹر پہنچنے پر وزیراعلیٰ کا کاٹی کے صدر محمد اکرام راجپوت، عہدیداروں اور ارکان نے پرتپاک استقبال کیا۔

تقریب میں صوبائی وزیر سعید غنی، حکومتی ترجمان نادر گبول، انسپکٹر جنرل پولیس جاوید عالم اوڈھو، صنعتکار، کاروباری شخصیات، اعلیٰ سرکاری افسران اور دیگر معزز مہمان شریک ہوئے۔

اجتماع سے خطاب کرتے ہوئے وزیراعلیٰ نے کہا کہ کاروباری برادری سے ملاقات ہمیشہ خوش آئند ہوتی ہے اور انہوں نے صنعتی علاقوں کی ترقی سے متعلق حکومتی اقدامات میں کاٹی کے تعمیری کردار کو سراہا۔

انہوں نے کہا کہ کاٹی میں موجود ہونا میرے لیے اعزاز کی بات ہے۔ صنعتی علاقوں میں متعدد ترقیاتی منصوبے کاٹی کی مشاورت اور سفارشات سے مکمل ہوئے ہیں اور ہم اس شراکت داری کو بہت اہمیت دیتے ہیں۔

مراد علی شاہ نے کہا کہ صنعتی ترقی سندھ حکومت کی اولین ترجیحات میں شامل ہے۔نہوں نے کہا کہ ہمارا مقصد صرف سڑکیں اور پل تعمیر کرنا نہیں بلکہ ایسا سازگار ماحول پیدا کرنا ہے جہاں صنعتیں ترقی کریں، سرمایہ کاری بڑھے اور روزگار کے نئے مواقع پیدا ہوں۔وزیراعلیٰ نے تاج حیدر پل، کورنگی کراسنگ پل اور ملیر ایکسپریس وے/شہید بھٹو ایکسپریس وے سمیت بڑے انفراسٹرکچر منصوبوں کا ذکر کرتے ہوئے انہیں ایسے منصوبے قرار دیا جو صنعتی رابطوں اور لاجسٹکس کے نظام میں نمایاں بہتری لائیں گے۔

انہوں نے کہا کہ شہید بھٹو ایکسپریس وے کو کراچی پورٹ سے منسلک کرنا تجارت اور صنعت کے لیے گیم چینجر ثابت ہوگا۔ بندرگاہ تک براہِ راست رسائی سے نقل و حمل کے اخراجات کم ہوں گے، سفری سہولت بہتر ہوگی اور شہر بھر میں صنعتی و تجارتی سرگرمیوں کو فروغ ملے گا۔وزیراعلیٰ نے صنعتکاروں کو یقین دلایا کہ مالی مشکلات کے باوجود صوبائی حکومت تمام صنعتی علاقوں میں بنیادی ڈھانچے کی بہتری کے لیے سرمایہ کاری جاری رکھے گی۔انہوں نے کہا کہ مشکل مالی حالات کے باوجود ہم نے ترقیاتی کاموں کی رفتار کم نہیں ہونے دی۔

سندھ بھر کے صنعتی علاقوں کی بہتری کے لیے فنڈز کی فراہمی جاری رہے گی۔امن و امان سے متعلق صنعتکاروں کے خدشات کا ذکر کرتے ہوئے وزیراعلیٰ سندھ نے کہا کہ کورنگی صنعتی علاقے میں سیکیورٹی سے متعلق مسائل کی نشاندہی ہوتے ہی حکومت نے فوری اقدامات کیے۔انہوں نے کہا کہ جب کاٹی نے امن و امان سے متعلق خدشات کا اظہار کیا تو ہم نے فوری طور پر انتظامیہ، پولیس اور صنعتکاروں کے نمائندوں پر مشتمل ایک خصوصی ٹاسک فورس قائم کی۔ آج خود کاٹی اس اقدام کے مثبت نتائج کا اعتراف کر رہی ہے۔

نہوں نے کہا کہ معاشی سرگرمیوں اور سرمایہ کاروں کے اعتماد کے لیے امن و استحکام بنیادی حیثیت رکھتا ہے۔ صحت کے شعبے میں اصلاحات کا ذکر کرتے ہوئے مراد علی شاہ نے ڈاکٹر عبدالباری خان سے اپنی پہلی ملاقات کو یاد کیا۔انہوں نے کہا کہ ڈاکٹر عبدالباری خان ایک مرتبہ مجھ سے ملنے آئے اور انڈس اسپتال کا دورہ کرنے کی دعوت دی۔ وہاں ہونے والا غیر معمولی کام دیکھنے کے بعد ہم نے ایک شراکت داری شروع کی، جو آج صحت کے شعبے میں عوامی و نجی اشتراک کی کامیاب ترین مثالوں میں شمار ہوتی ہے۔

وزیراعلیٰ نے کہا کہ سندھ حکومت انڈس اسپتال نیٹ ورک کی صرف مالی معاون نہیں بلکہ صحت کی سہولیات کے فروغ میں حقیقی شراکت دار ہے۔انہوں نے کہا کہ ہم اپنے ترقیاتی اور طبی شراکت داروں کے ساتھ خلوص اور عزم کے ساتھ کام کر رہے ہیں۔ عوامی و نجی اشتراک کے مثبت نتائج اب لاکھوں افراد تک پہنچ رہے ہیں۔

انہوں نے کہا کہ انڈس اسپتال نیٹ ورک کے ساتھ حکومت کی شراکت صرف کراچی تک محدود نہیں بلکہ بدین اور دیگر پسماندہ اضلاع تک بھی پھیلی ہوئی ہے۔ انہوں نے کہا کہ ہماری کوشش ہے کہ ہر شہری کو، خواہ وہ کسی بھی علاقے میں رہتا ہو، معیاری طبی سہولیات میسر آئیں۔عوامی خدمت کے حوالے سے گفتگو کرتے ہوئے وزیراعلیٰ نے کہا کہ عوام کی خدمت ان کی زندگی کا بنیادی مقصد ہے۔

انہوں نے کہا کہ میں دیانتداری، خلوص اور لگن کے ساتھ کام کرتا ہوں۔ چونکہ میں اپنے فرائض صاف نیت اور عوامی مفاد میں انجام دیتا ہوں، اس لیے رات کو سکون سے سوتا ہوں۔ انہوں نے کہا کہ عوامی خدمت ان کی اولین ترجیح ہے اور وہ پوری وابستگی کے ساتھ یہ ذمہ داری نبھاتے رہیں گے۔

کراچی کے بارے میں گفتگو کرتے ہوئے مراد علی شاہ نے کہا کہ شہر کے حوالے سے متوازن اور مثبت بیانیہ اپنانے کی ضرورت ہے۔ انہوں نے کہا کہ کراچی میرا شہر ہے اور مجھے اس سے خاص محبت ہے۔ دنیا کے ہر بڑے شہر کی طرح اسے بھی مختلف مسائل کا سامنا ہے، تاہم حکومت ان کے حل کے لیے مسلسل کام کر رہی ہے۔وزیراعلیٰ نے کہا کہ کراچی میں ترقیاتی منصوبوں کے دوران اکثر غیر متوقع تکنیکی رکاوٹیں سامنے آتی ہیں کیونکہ زیر زمین پرانے انفراسٹرکچر کا مکمل ریکارڈ اور انجینئرنگ نقشے دستیاب نہیں ہوتے۔

انہوں نے کہا کہ کھدائی کے دوران ایسی یوٹیلیٹی لائنیں اور تنصیبات سامنے آ جاتی ہیں جن کا کوئی ریکارڈ موجود نہیں ہوتا، جس کے باعث منصوبوں میں تاخیر ہوتی ہے۔ یہ تکنیکی مسائل ہیں جنہیں حل کرنے کے لیے وقت اور وسائل درکار ہوتے ہیں۔انہوں نے شہریوں اور تمام متعلقہ حلقوں پر زور دیا کہ وہ شہر کا غیر ضروری منفی تاثر پیش کرنے سے گریز کریں۔انہوں نے کہا کہ اپنے ہی شہر کے بارے میں مسلسل منفی باتیں کرنے سے عالمی سطح پر غلط تاثر پیدا ہوتا ہے۔ ہم سب کی ذمہ داری ہے کہ کراچی کی مثبت پہلوؤں کو اجاگر کریں اور اس کی ترقی اور ساکھ کے لیے مثبت کردار ادا کریں۔

وزیراعلیٰ سندھ نے ڈاکٹر عبدالباری خان کو صحت کے شعبے میں ان کی عمر بھر کی خدمات پر زبردست خراجِ تحسین پیش کیا۔انہوں نے کہا کہ ڈاکٹر عبدالباری خان کی عوامی صحت کے شعبے میں خدمات غیر معمولی ہیں۔ انڈس اسپتال نیٹ ورک کے ذریعے انہوں نے معیاری طبی سہولیات فراہم کرکے بے شمار افراد کی زندگیوں میں مثبت تبدیلی پیدا کی ہے۔

انہوں نے انڈس اسپتال کی مفت اور معیاری علاج کی پالیسی کو سراہتے ہوئے اسے ہمدردی، خدمت اور بہترین کارکردگی کی مثال قرار دیا۔اس موقع پر کاٹی کے صدر محمد اکرام راجپوت نے وزیراعلیٰ سندھ کا صنعتی شعبے کی مسلسل معاونت پر شکریہ ادا کرتے ہوئے صنعتی علاقوں میں انفراسٹرکچر کی بہتری کے لیے صوبائی حکومت کے اقدامات کو سراہا۔

انہوں نے شہید بھٹو ایکسپریس وے، کورنگی فلائی اوورز کی تعمیر اور صنعتی علاقوں میں ترقیاتی منصوبوں کے لیے 2 ارب روپے کی خصوصی گرانٹ کی فراہمی پر وزیراعلیٰ کا شکریہ ادا کیا۔محمد اکرام راجپوت نے کہا کہ وزیراعلیٰ سندھ نے پہلے بھی گرانٹس فراہم کیں جن سے صنعتی علاقوں میں معیاری سڑکوں کی تعمیر ممکن ہوئی۔ نئی 2 ارب روپے کی گرانٹ سے مزید ترقیاتی منصوبے شروع کیے جائیں گے، جن سے صنعتی انفراسٹرکچر میں مزید بہتری آئے گی۔

انہوں نے کورنگی کراسنگ ایجوکیشن سٹی کے علاقے میں تعلیمی اداروں اور اطراف کی آبادی کو بہتر سفری سہولت فراہم کرنے کے لیے تین کلومیٹر طویل لوپ روڈ تعمیر کرنے کی بھی درخواست کی۔

تقریب سے خطاب کرتے ہوئے کاٹی کے سابق صدر زبیر چھایا نے صحت کے شعبے میں سندھ حکومت کے اقدامات کو سراہتے ہوئے کہا کہ گمبٹ انسٹی ٹیوٹ، قومی ادارہ برائے امراضِ قلب، جناح اسپتال، قومی ادارہ برائے صحتِ اطفال اور انڈس اسپتال جیسے اداروں کے ساتھ شراکت داری نے صوبے میں صحت کی سہولیات میں نمایاں بہتری پیدا کی ہے۔

تقریب میں اظہارِ خیال کرتے ہوئے ڈاکٹر عبدالباری خان نے اس اعزاز پر کاٹی اور سندھ حکومت کا شکریہ ادا کیا۔انہوں نے کہا، ’’صحت کے ذریعے انسانیت کی خدمت میرے لیے اعزاز اور سعادت ہے۔