امریکہ اسرائیلی جرائم میں شریک،کسی بھی نئے حملے کے جواب کیلئے تیارہیں:خامنہ ای

تہران ،بیجنگ:(ویب ڈیسک)ایران کے سپریم لیڈر آیت اﷲ خامنہ ای نے کہا ہے کہ اسرائیل کی جنگ کا مقصد ایران میں نظام کا تختہ الٹنا تھا، ایران کسی بھی نئے فوجی حملے کا جواب دینے کے لیے تیار ہے۔میڈیارپورٹس کے مطابق اپنے بیان میں آیت اﷲ خامنہ ای نے کہا کہ ایران دشمنوں کو اسرائیل والی جنگ سے بھی بڑا دھچکا دینے کی صلاحیت رکھتا ہے، امریکا اسرائیل کے جرائم میں شریک ہے۔ دریں اثنا چین کے وزیر خارجہ وانگ یی نے کہا ہے کہ چین ایران کی خود مختاری اور وقار کے تحفظ کی حمایت جاری رکھے گا۔

چینی وزیر خارجہ وانگ یی نے ایران سے متعلق بیان میں کہا ہے کہ چین ایران کے جوہری ہتھیار نہ بنانے کے عزم کو اہمیت دیتا ہے۔انہوں نے کہا کہ چین پرامن مقاصد کے لیے جوہری توانائی کے استعمال کے ایران کے حق کا احترام کرتا ہے، چین ہمیشہ طاقت کے استعمال یا اس کی دھمکی کی مخالفت کرتا ہے، چین اختلافات کو بات چیت اور مشاورت کے ذریعے حل کرنے کا حامی ہے۔

دریں اثنا امریکی صدر ڈونلڈ ٹرمپ نے کہا ہے کہ ایران سے بات کرنے کی کوئی جلدی نہیں، ایران کی جوہری تنصیبات کو مکمل طور پر تباہ کردیا ہے۔ مزید براں امریکا، برطانیہ، فرانس اور جرمنی نے ایران سے نیوکلیئر ڈیل کے لیے اگست کے اختتام تک کی ڈیڈلائن مقرر کرنے پر اتفاق کرلیا ہے۔

امریکی وزیر خارجہ مارکو روبیو نے برطانیہ، فرانس اور جرمن ہم منصب کو ٹیلی فون کیا اور اس بات پر اتفاق کیا کہ ایران کے نیوکلیئر پروگرام پر حتمی سمجھوتے کے لیے اگست کے اختتام تک کی مہلت رکھی جائے۔ ڈیل نہ ہونے کی صورت میں یہ ممالک ایران پر اقوام متحدہ کی سلامتی کونسل کی وہ تمام پابندیاں پھر سے عائد کرنے کا ارادہ رکھتے ہیں جو سن 2015 میں ایران نیوکلیئر ڈیل کے موقع پر اٹھالی گئی تھیں۔