اسلام آباد (ویب ڈیسک) صدر مملکت آصف علی زرداری اور وزیراعظم شہباز شریف کے درمیان ایوانِ صدر میں ملاقات ہوئی، جس میں اہم قومی امور، داخلی و خارجی صورتحال، علاقائی حالات اور دہشت گردی کے خلاف جاری کارروائیوں پر تفصیلی تبادلہ خیال کیا گیا۔
ملاقات میں نائب وزیراعظم و وزیر خارجہ اسحاق ڈار، وزیر داخلہ محسن نقوی، سینیٹر شیری رحمان اور اسپیکر پنجاب اسمبلی ملک محمد احمد خان بھی موجود تھے۔
وزیراعظم شہباز شریف نے صدر مملکت کو یومِ آزادی کی مبارکباد دی اور انہیں مکہ مکرمہ میں پاکستان، سعودی عرب اور ترکیہ کے درمیان ہونے والے تاریخی معاہدے سے آگاہ کیا۔
صدر آصف علی زرداری نے سہ فریقی معاہدے پر مؤثر عمل درآمد کے لیے نیک خواہشات کا اظہار کرتے ہوئے وزیراعظم شہباز شریف اور فیلڈ مارشل سید عاصم منیر کی کاوشوں کو سراہا۔
دہشت گردی کے مکمل خاتمے کے عزم کا اعادہ
ملاقات کے دوران صدر مملکت اور وزیراعظم نے پاکستان کی مسلح افواج اور قانون نافذ کرنے والے اداروں کی پیشہ ورانہ صلاحیتوں کو خراج تحسین پیش کیا۔
دونوں رہنماؤں نے وطن عزیز سے دہشت گردی کے ناسور کے مکمل خاتمے کے عزم کا اعادہ کیا اور ملکی سلامتی کے لیے جاری اقدامات کو مزید مؤثر بنانے پر اتفاق کیا۔
پاکستان اپنے دفاع اور آبی وسائل کے تحفظ کے لیے کسی قربانی سے دریغ نہیں کرے گا: وزیراعظم
وزیراعظم شہباز شریف نے یومِ آزادی کے موقع پر اپنے پیغام میں کہا ہے کہ پاکستان اپنے دفاع، آبی وسائل اور قومی مفادات کے تحفظ کے لیے کسی قربانی سے دریغ نہیں کرے گا۔
سماجی رابطے کی ویب سائٹ ایکس پر جاری پیغام میں وزیراعظم نے پاکستان اور بیرون ملک مقیم تمام پاکستانیوں کو یومِ آزادی کی مبارکباد پیش کرتے ہوئے کہا کہ پاکستان کی آزادی کے 79 سال مکمل ہونے کا موقع پوری قوم کے لیے باعثِ مسرت اور فخر ہے۔
شہباز شریف نے کہا کہ ہمیں اپنی بہادر افواج پر فخر ہے، آج پاکستان اقوام عالم میں ایک مضبوط، پُرعزم، باوقار اور امن کی توانا آواز کے طور پر پہچانا جاتا ہے۔
قائداعظم اور تحریک آزادی کے رہنماؤں کو خراج عقیدت
وزیراعظم نے کہا کہ یہ امر ہمارے لیے باعثِ عزت و افتخار ہے کہ جدوجہد آزادی میں بابائے قوم قائداعظم محمد علی جناحؒ، مفکر پاکستان و شاعر مشرق علامہ محمد اقبالؒ اور متعدد عظیم رہنماؤں نے اہم کردار ادا کیا۔
انہوں نے کہا کہ آج ہم بحیثیت قوم تحریک آزادی کے قائدین، کارکنوں اور اسلافِ ملت کو سلام پیش کرتے ہیں۔
شہباز شریف کے مطابق قائداعظم محمد علی جناحؒ کی مدبرانہ اور بصیرت افروز قیادت، ہمارے آباؤ اجداد کی عظیم قربانیوں، تحریک آزادی کے رہنماؤں کے غیر متزلزل عزم اور اللہ تعالیٰ کے فضل و کرم سے آزاد مملکت کا خواب شرمندہ تعبیر ہوا۔
انہوں نے کہا کہ تحریک آزادی کے رہنماؤں کی ولولہ انگیز سیاسی جدوجہد نے مسلمانانِ ہند کو آزاد وطن کے حصول کے مقصد پر متحد کیا، جبکہ ہمارے آباؤ اجداد نے لازوال قربانیوں، صعوبتوں اور تکالیف کا سامنا کرتے ہوئے آزادی کی منزل حاصل کی۔
14 اگست 1947 پاکستان کی آزادی کا تاریخی دن
وزیراعظم نے کہا کہ 14 اگست 1947 کو ہمیں ایسی سرزمین میسر آئی جہاں ہم ایک آزاد قوم کی حیثیت سے عزت و وقار اور اپنی دینی و تہذیبی اقدار کے مطابق زندگی گزار سکیں۔
انہوں نے کہا کہ سرزمین پاکستان اسلامی تعلیمات اور بابائے قوم کے نظریات کے مطابق تمام شہریوں کے لیے بلا تفریق رنگ و نسل آزادی کی ضمانت فراہم کرتی ہے، جبکہ آئین اور قوانین تمام شہریوں کے حقوق کے ضامن ہیں۔
معیشت کو مستحکم کرنے کے بعد ترقی کی منزل کی جانب گامزن ہیں: شہباز شریف
وزیراعظم نے کہا کہ پاکستان کی ترقی و خوشحالی کا سفر تابناک مستقبل کی جانب گامزن ہے۔ دفاع وطن، معیشت، صنعت و حرفت، عدلیہ، میڈیا، کھیل، تعلیم و ہنر، سائنس، زراعت اور دیگر شعبوں میں پاکستانی مرد و خواتین نے اپنی صلاحیتوں اور محنت سے کامیابیوں کے باب رقم کیے ہیں۔
انہوں نے کہا کہ باصلاحیت نوجوان، ہنرمند افرادی قوت، پیشہ ور ماہرین، محنتی کسان اور مزدور ملک و قوم کے روشن مستقبل کے ضامن ہیں۔
شہباز شریف نے کہا کہ حکومت پاکستان نے گزشتہ ڈھائی سال کے دوران مشکل مراحل عبور کرتے ہوئے مستحکم معیشت کا ہدف حاصل کیا ہے اور اب ملک ترقی یافتہ معیشت کی منزل کی جانب کامیابی سے آگے بڑھ رہا ہے۔
ترسیلات زر میں 11.3 ارب ڈالر اضافہ
وزیراعظم نے بتایا کہ گزشتہ دو برس کے دوران بیرون ملک مقیم پاکستانیوں کی ترسیلات زر میں 11.3 ارب ڈالر کا اضافہ ہوا، جو حکومتی پالیسیوں پر اوورسیز پاکستانیوں کے مسلسل اعتماد کا مظہر ہے۔
انہوں نے کہا کہ جدید انفارمیشن ٹیکنالوجی سے لیس معیشت، جدت سے آراستہ دیرپا صنعتی و زرعی ترقی، عوامی فلاح و بہبود کے منصوبے، روزگار کے مواقع اور عالمی معیار کا تعلیم و ہنر کا نظام حکومت کی اولین ترجیحات میں شامل ہیں۔
مسلح افواج نے دفاع وطن کو ناقابل تسخیر بنایا: وزیراعظم
شہباز شریف نے کہا کہ ہماری بہادر افواج نے ہر مشکل گھڑی میں اور دشمن کے ہر وار کا بھرپور جواب دیتے ہوئے مادر وطن کے دفاع کو ناقابل تسخیر ثابت کیا ہے۔
انہوں نے کہا کہ پاکستان اپنی جری افواج پر فخر کرتا ہے۔ معرکہ حق میں مسلح افواج نے فیلڈ مارشل سید عاصم منیر کی قیادت میں اتحاد، عزم اور بے مثال بہادری کا مظاہرہ کرتے ہوئے وطن عزیز کے دفاع اور سربلندی کی نئی تاریخ رقم کی۔
وزیراعظم نے واضح کیا کہ پاکستان اپنے دفاع، آبی وسائل اور دیگر قومی مفادات کے تحفظ کے لیے کسی قربانی سے دریغ نہیں کرے گا۔
پاکستان امن اور علاقائی استحکام کی مضبوط آواز بن چکا ہے
شہباز شریف نے کہا کہ آج پاکستان اقوام عالم میں ایک مضبوط، پُرعزم اور باوقار ملک کے طور پر پہچانا جاتا ہے اور امن کی ایک توانا آواز بن کر ابھرا ہے۔
انہوں نے کہا کہ خطے کی مشکل اور چیلنجنگ صورتحال میں پاکستان ایک ذمہ دار ملک اور علاقائی استحکام کے ضامن کے طور پر سامنے آیا ہے، جو امن، استحکام اور علاقائی تعاون کے فروغ میں تعمیری کردار ادا کررہا ہے۔
پاکستان، سعودی عرب اور ترکیہ کے معاہدے کو اہم پیش رفت قرار
وزیراعظم نے کہا کہ مکہ مکرمہ میں پاکستان، سعودی عرب اور ترکیہ کے درمیان طے پانے والا مشترکہ دفاعی معاہدہ خطے میں پاکستان کے بڑھتے ہوئے تزویراتی کردار اور ابھرتی ہوئی قوت کا اہم مظہر ہے۔
انہوں نے کہا کہ پاکستان مظلوم فلسطینی عوام اور جموں و کشمیر کے اپنے بہن بھائیوں کے ساتھ مکمل یکجہتی کا اظہار کرتا ہے اور ان کے لیے اپنی غیر متزلزل اصولی حمایت کا اعادہ کرتا ہے۔
شہباز شریف نے کہا کہ جنوبی ایشیا میں پائیدار امن کی ضمانت جموں و کشمیر کے مسئلے کے اقوام متحدہ کی قراردادوں، عالمی قوانین اور کشمیری عوام کی امنگوں کے مطابق سفارتی حل میں پوشیدہ ہے۔
شہداء اور غازیوں کو خراج تحسین
وزیراعظم نے کہا کہ آج یومِ آزادی پر پوری قوم اپنی بہادر افواج، قانون نافذ کرنے والے اداروں کے دلیر جوانوں، غازیوں اور تمام شہداء کی مقروض ہے جنہوں نے قوم کے مستقبل کے لیے اپنی جانوں کے نذرانے پیش کیے۔
انہوں نے کہا کہ قوم اپنے شہداء کی قربانیوں کو ہمیشہ یاد رکھے گی اور ملکی دفاع و سلامتی کے لیے ان کی خدمات کو خراجِ عقیدت پیش کرتی رہے گی۔
قومی اتحاد اور یکجہتی کے لیے وزیراعظم کی اپیل
شہباز شریف نے قوم سے اپیل کی کہ یومِ آزادی پر اپنے قومی عزم کی تجدید کریں اور متحد ہوکر پاکستان کی ترقی، خوشحالی، امن، استحکام، باہمی ہم آہنگی اور یگانگت کے لیے بھرپور کردار ادا کریں۔
انہوں نے تمام طبقات اور سیاسی جماعتوں کو خلوص کے ساتھ دعوت دیتے ہوئے کہا کہ آئیں متحد ہوکر ملکی سالمیت، قومی مفادات کے تحفظ اور ان کے فروغ کے لیے تعمیری کام کریں۔
وزیراعظم نے دعا کی کہ اللہ تعالیٰ پاکستان کو دنیا میں عزت و وقار کی علامت بنائے، ملک کو کامیابیوں سے نوازے اور اسے ہمیشہ قائم و دائم رکھے۔
