پاکستان بزنس کونسل شارجہ اور پرتگال بزنس کونسل شارجہ کا B2Bاجلاس

شارجہ (حافظ زاہد علی )شارجہ چیمبر آف کامرس اینڈ انڈسٹری میں پاکستان بزنس کونسل شارجہ اور پرتگال بزنس کونسل شارجہ کے درمیان ایک نہایت مفید B2B میٹنگ منعقد ہوئی۔اس اجلاس کا بنیادی مقصد دو طرفہ تعلقات کو مضبوط بنانا اور مختلف شعبوں جیسے زراعت، مصنوعی ذہانت (AI)، قابلِ تجدید توانائی، اور سیاحت میں جدید تعاون کے مواقع تلاش کرنا تھا۔

اجلاس کا مقصد مختلف کاروباری شعبوں میں تعاون کو بڑھانا تھا

ملاقات کے دوران دونوں کونسلز نے اتفاق کیا کہ پاکستان اور پرتگال کے درمیان تجارتی وفود کا تبادلہ کیا جائے گا تاکہ دونوں ممالک کے کاروباری حلقوں کے درمیان روابط کو مزید فروغ دیا جا سکے۔ یہ اقدام نہ صرف باہمی تجارت کو وسعت دے گا بلکہ ٹیکنالوجی، تجربات، اور بہترین طریقہ کار کے تبادلے کے لیے بھی راہیں ہموار کرے گا۔

مشترکہ فیصلے کے مطابق تجارتی وفود کا تبادلہ ہوگا اور کاروبار کو وسعت دینے کیلئے کاوشیں کی جائیں گی

دونوں فریقوں نے اس بات پر زور دیا کہ تعاون اور نیٹ ورکنگ کے ذریعے مشترکہ ترقی اور خوشحالی کے اہداف حاصل کیے جا سکتے ہیں۔ پاکستان اور پرتگال باہمی اشتراک سے اپنی اپنی صلاحیتوں کو بروئے کار لا کر ایک زیادہ متحرک اور مربوط کاروباری ماحول تشکیل دے سکتے ہیں۔

اجلاس کی صدارت پرتگال بزنس کونسل شارجہ کی چیئرپرسن میڈم لورڈس یوسیبویو اور پاکستان بزنس کونسل شارجہ کے سینئر وائس چیئرمین مسٹر سید سلیم اختر نے کی۔پاکستان بزنس کونسل شارجہ کی جانب سے شریک اراکین میں مسٹر عامر حسن (وائس چیئرمین)، مسٹر سلمان وصال (جنرل سیکرٹری)، ڈاکٹر نورالصبح (صدر ویمن وِنگ)، مسٹر شفیق الرحمٰن، مسٹر صفدر رشید، مسٹر ظہیر احمد، مسٹر علی غضنفر، مسٹر محمد فاروق، اور مسٹر شیر اسلم شامل تھے۔اجلاس کے اختتام پر دونوں کونسلز کے نمائندوں کے درمیان یادگاری شیلڈز کا تبادلہ کیا گیا، جو باہمی خیرسگالی اور آئندہ تعاون کے عزم کی علامت تھا۔