پاکستان ورلڈ آرٹیفیشل انٹیلی جنس کوآپریشن آرگنائزیشن (WAICO) کا بانی رکن بن گیا
شنگھائی (ویب ڈیسک): پاکستان ورلڈ آرٹیفیشل انٹیلی جنس کوآپریشن آرگنائزیشن (WAICO) کا بانی رکن بن گیا ہے۔ شنگھائی میں قائم اس نئی بین الحکومتی تنظیم کے قیام کے معاہدے پر پاکستان سمیت 29 ممالک نے دستخط کیے ہیں۔
چائنہ اکنامک نیٹ کے مطابق چین کی وزارتِ خارجہ نے اپنے بیان میں کہا ہے کہ پاکستان کے نائب وزیراعظم اور وزیر خارجہ اسحاق ڈار نے چین، قازقستان، لاوس، روس، انڈونیشیا اور دیگر ممالک کے نمائندوں کے ساتھ معاہدے پر دستخط کیے۔
چینی وزیر خارجہ وانگ ای نے چین کی جانب سے معاہدے پر دستخط کیے، جبکہ تقریب میں اقوام متحدہ کے سیکرٹری جنرل انتونیو گوتریس سمیت مختلف ممالک اور بین الاقوامی تنظیموں کے نمائندے بھی شریک ہوئے۔
WAICO کیا ہے؟
ورلڈ آرٹیفیشل انٹیلی جنس کوآپریشن آرگنائزیشن (WAICO) ایک آزاد بین الحکومتی تنظیم ہوگی، جس کا مقصد مصنوعی ذہانت (Artificial Intelligence) کے شعبے میں عالمی تعاون کو فروغ دینا، ٹیکنالوجی کے ذمہ دارانہ استعمال کو یقینی بنانا اور AI کی مؤثر عالمی حکمرانی کے لیے مشترکہ لائحہ عمل تشکیل دینا ہے۔
تنظیم ایسی مصنوعی ذہانت کی ترقی کی حمایت کرے گی جو انسانیت کے لیے مفید، محفوظ، قابلِ اعتماد اور منصفانہ ہو۔
پاکستان کے لیے اہمیت
ماہرین کے مطابق WAICO کی بانی رکنیت پاکستان کے لیے مصنوعی ذہانت کے شعبے میں عالمی سطح پر تعاون، تحقیق، ٹیکنالوجی کی منتقلی، استعداد کار میں اضافے اور مستقبل کی ڈیجیٹل معیشت میں مؤثر کردار ادا کرنے کے نئے مواقع پیدا کرے گی۔
