راولپنڈی/کوئٹہ (ویب ڈیسک) سکیورٹی فورسز نے آپریشن العزم کے تحت بلوچستان میں انٹیلی جنس بیسڈ کارروائیاں جاری رکھتے ہوئے مستونگ میں مزید 3 دہشتگرد ہلاک کر دیے۔ سکیورٹی ذرائع کے مطابق حالیہ کارروائیوں کے بعد ہلاک دہشتگردوں کی مجموعی تعداد 16 ہوگئی ہے۔
مستونگ سمیت مختلف علاقوں میں مؤثر کارروائیاں
سکیورٹی ذرائع کے مطابق بلوچستان کے کلی کند عمرانی، خڈکوچہ اور مستونگ سمیت مختلف علاقوں میں دہشتگردوں کے خلاف کامیاب آپریشن کیے گئے۔ کارروائیوں کے دوران دہشتگردوں کے متعدد ٹھکانے اور کمین گاہیں تباہ کر دی گئیں جبکہ بڑی مقدار میں اسلحہ اور دھماکہ خیز مواد بھی برآمد کیا گیا۔
دہشتگردی کے خاتمے تک کارروائیاں جاری رہیں گی
سکیورٹی ذرائع کا کہنا ہے کہ بلوچستان سے دہشتگردی کے مکمل خاتمے اور امن و امان کے قیام تک سکیورٹی فورسز کی کارروائیاں پوری قوت کے ساتھ جاری رہیں گی۔
ہرنائی میں ٹیلی کمیونیکیشن ٹاور تباہ
دوسری جانب بلوچستان کے ضلع ہرنائی میں نامعلوم افراد نے دھماکہ خیز مواد کے ذریعے ایک ٹیلی کمیونیکیشن ٹاور کو تباہ کر دیا، جس کے باعث علاقے میں لینڈ لائن فون اور انٹرنیٹ سروس معطل ہوگئی۔
ڈیلکونہ پولیس تھانے کو بھی نشانہ بنایا گیا
پولیس کے مطابق حملہ آوروں نے ڈیلکونہ پولیس تھانے کی عمارت کو بھی دھماکہ خیز مواد سے نشانہ بنایا، جس سے عمارت کو نقصان پہنچا۔ خوش قسمتی سے واقعے کے وقت تھانے میں کوئی اہلکار موجود نہیں تھا، جس کے باعث جانی نقصان نہیں ہوا۔
