اسلام آباد (ویب ڈیسک): وزیراعظم شہباز شریف نے جنوبی وزیرستان میں سکیورٹی فورسز کی چیک پوسٹ پر دہشتگردوں کے حملے کو ناکام بنانے پر فورسز کی پیشہ ورانہ مہارت، بروقت کارروائی اور غیر معمولی جرات کو سراہتے ہوئے کہا ہے کہ ملکی سلامتی پر کوئی آنچ نہیں آنے دی جائے گی اور دہشتگردی کے مکمل خاتمے تک کارروائیاں جاری رہیں گی۔
جنوبی وزیرستان میں دہشتگرد حملہ ناکام
وزیراعظم آفس سے جاری بیان کے مطابق جنوبی وزیرستان میں سکیورٹی فورسز نے چیک پوسٹ پر ہونے والے حملے کو مؤثر انداز میں ناکام بنایا اور حملہ آور دہشتگردوں کو ہلاک کر دیا۔ وزیراعظم شہباز شریف نے کامیاب کارروائی پر فورسز کو خراجِ تحسین پیش کیا۔
سکیورٹی فورسز کی جرات کو خراج تحسین
وزیراعظم نے کہا کہ پاکستان کے بہادر جوانوں نے دشمن کے مذموم عزائم کو ناکام بنا کر ایک بار پھر ثابت کیا ہے کہ وطن عزیز کے دفاع پر کوئی سمجھوتہ نہیں کیا جا سکتا۔ انہوں نے کہا کہ پوری قوم اپنی مسلح افواج اور قانون نافذ کرنے والے اداروں کے ساتھ کھڑی ہے۔
دہشتگردی کے خلاف آپریشن جاری رکھنے کا عزم
شہباز شریف نے کہا کہ حکومت اور سکیورٹی فورسز آپریشن عزمِ استحکام کے تحت دہشتگردی کے ناسور کے مکمل خاتمے تک اپنی کارروائیاں پوری قوت کے ساتھ جاری رکھیں گے۔ انہوں نے اس عزم کا اعادہ کیا کہ ملک میں امن و استحکام کے قیام کے لیے ہر ممکن اقدام کیا جائے گا۔
