امریکہ کا جنگی بحری بیڑا مشرق وسطیٰ روانہ، ایران پر نئی پابندیاں عائد

واشنگٹن،تہران (ویب ڈیسک)ایران کے ساتھ کشیدگی کے تناظر میں امریکہ نے جنگی بحری بیڑا مشرق وسطیٰ کی جانب روانہ کر دیا ہے۔عالمی خبر رساں ادارے کے مطابق امریکہ نے ممکنہ طور پر ایران کی جانب پیش قدمی کیلئے مشرق وسطیٰ میں صف بندی شروع کردی ہے۔ پینٹاگون نے بتایا کہ بحیرہ جنوبی چین سے طیارہ بردار جہاز یو ایس ایس ابراہام لنکن کو مشرق وسطیٰ روانہ کر دیا ہے۔

جنگی بیڑے میں طیارہ بردار جہاز، ڈسٹرائر، تباہ کن جہاز اور جنگی کشتیاں شامل ہیں۔ یہ بیڑا اب امریکی سینٹ کام کے ماتحت ہوگا۔صدر ٹرمپ نے کہا ہے کہ وہ تمام ممکنہ آپشنز کھلے رکھے ہوئے ہیں، اگر ایران نے مظاہرین پر تشدد جاری رکھا تو شدید اور بڑی فوجی کارروائی کیلئے تیار ہے۔ٹرمپ انتظامیہ نے ایران پر نئی پابندیاں عائد کر دیں جن میں ایران سے تعلق پرشخصیات اور کمپنیوں کو نشانہ بنایا گیا ہے۔

امریکی وزارت خزانہ کے مطابق ایرانی نژاد 11شخصیات جبکہ متحدہ عرب امارات، سنگاپور، برطانیہ اور ایران میں قائم 12کمپنیوں پر پابندیاں لگائی گئی ہیں۔دریں اثنا سلامتی کونسل کے اجلاس میں امریکی مندوب مائیک والز نے کہا کہ ایران خبردار رہے صدر ٹرمپ نےتمام آپشنز میز پر رکھے ہوئے ہیں، صدر ٹرمپ باتوں نہیں ایکشن والے شخص ہیں۔ایران میں قتل عام رکنا چاہیے۔

انہوں نے ایران پر صدر ٹرمپ پر قاتلانہ حملے کی سازش میں ملوث ہونے کا بھی الزام لگایا اور کہا کہ بہت ہو گیا، ایرانی حکومت کے مظالم ختم کرنا ہوں گے۔اجلاس میں ایرانی مندوب امیر سعید ایروانی نے کہا کہ ہم کشیدگی چاہتے ہیں نہ تصادم، اگر جارحیت کی گئی تو فیصلہ کن جواب دیں گے۔ امریکہ کا ایران کے معاملے پر سلامتی کونسل کا اجلاس بلانا شرمناک ہے۔ایران معاملے کو سفارتی طریقے سے حل کرنا چاہتا ہے مگر براہ راست یا بالواسطہ جارحیت کی جاتی ہے تو ایران فیصلہ کن جواب دے گا۔

اقوام متحدہ میں چین کے قائم مقام مستقل مندوب سن لے نے کہا کہ چین ایران کے خلاف فوجی طاقت کے استعمال کی دھمکی کی سخت مخالفت کرتا ہے اور زور دیتا ہے کہ ایران کے اندرونی معاملات کا فیصلہ ایرانی عوام کو خود کرنا چاہیے۔امریکہ ایران کے خلاف طاقت کے استعمال کی ضد ترک کر دے، طاقت مسائل کو حل نہیں کر سکتی بلکہ انہیں مزید پیچیدہ اور مشکل بنا دیتی ہے۔

علاوہ ازیں سوئٹزرلینڈ نے امریکہ اور ایران کے درمیان ثالثی کی پیشکش کر دی۔سوئس وزارت خارجہ کے مطابق محکمہ بین الاقوامی سلامتی کے سربراہ گیبریل نے ایرانی سلامتی کونسل کے عہدیدار علی لاریجانی سے ٹیلیفونک گفتگو کی اور کشیدگی میں کمی کیلئے مدد کی پیشکش کی۔