کراچی(ویب ڈیسک) پاک بحریہ نے پاکستان میری ٹائم سکیورٹی ایجنسی (PMSA) کے تعاون سے بروقت اور مربوط کارروائی کرتے ہوئے بحیرہ عرب میں ڈوبنے کے خطرے سے دوچار کارگو کشتی کے 20 رکنی عملے کو کامیاب سرچ اینڈ ریسکیو آپریشن کے ذریعے بحفاظت بچا لیا۔
کارگو کشتی کراچی سے خلیج عمان کی جانب روانہ تھی کہ اورماڑہ کے مشرق میں سفر کے دوران اس میں اچانک پانی بھرنا (Flooding) شروع ہو گیا۔ خراب موسمی حالات اور سمندر میں بلند لہروں کے باعث کشتی کو شدید خطرات لاحق ہو گئے، جس سے عملے کی جانیں بھی خطرے میں پڑ گئیں۔
امدادی کال ملتے ہی فوری کارروائی
امدادی کال موصول ہوتے ہی جوائنٹ میری ٹائم انفارمیشن کوآرڈینیشن سینٹر (JMICC) نے فوری طور پر پاک بحریہ سے رابطہ کیا، جس کے بعد سرچ اینڈ ریسکیو آپریشن کا آغاز کر دیا گیا۔
پاک بحریہ نے فوری ردعمل دیتے ہوئے اپنے بحری اور فضائی وسائل متحرک کیے اور پی این ایس حنین (PNS Hunain) کو جائے وقوعہ کی جانب روانہ کیا۔ اس کے ساتھ ہی سی کنگ (Sea King) ہیلی کاپٹر کو فضائی نگرانی اور امدادی کارروائیوں کے لیے تعینات کیا گیا۔
تمام 20 افراد کو بحفاظت بچا لیا گیا
پاک بحریہ کے بروقت اور پیشہ ورانہ اقدامات کے نتیجے میں کارگو کشتی کے تمام 20 افراد کو بحفاظت ریسکیو کر لیا گیا۔ ریسکیو کیے گئے عملے کو فوری طبی امداد فراہم کی جا رہی ہے اور ان کی حالت خطرے سے باہر بتائی گئی ہے۔
سمندر میں انسانی جانوں کے تحفظ کے عزم کا اظہار
پاک بحریہ کے مطابق یہ کامیاب آپریشن سمندر میں انسانی جانوں کے تحفظ، ہنگامی حالات سے مؤثر انداز میں نمٹنے اور ہر وقت آپریشنل تیاری برقرار رکھنے کے عزم کا مظہر ہے۔ ترجمان کے مطابق پاک بحریہ مستقبل میں بھی ملکی سمندری حدود میں کسی بھی ہنگامی صورتحال سے نمٹنے کے لیے مکمل طور پر تیار ہے۔
